နင့်အတွက်ငါရဲ့ ဆန္ဒမှန်

မိုးမြင့်ထက်ဆီ
တိမ်တိုက်တွေ စစ်ခင်းလို့
ရှုံးနိမ့်မှု့ရဲ့ရလဒ်
အက်စစ်မိုးစက်တွေအဖြစ်
ကမ္ဘာမြေပေါ်သို့
မိုးသီးတွေပါ တပါတည်းခေါ်ဆောင်လာပြီး
ခပ်ပြင်းပြင်း အငြိုးကြီးစွာ ရွာချတဲ့ မိုးစက်တွေကို
ကောင်းကင်ကို ငါမော့
မျက်တောင်တစ်ချက်လေးမှ မခတ်ပဲ
စူးစိုက်ပြီး ကြည့်နိုင်ပါတယ် ချစ်သူ  

သို့သော်
ငါ့အတွက်နဲ့ နင်နာကျင်စရာမှသည်
နားကျည်းစရာ ဝေဒနာသို့ကူးပြောင်း
နင့်နှလုံးသားမှာ ခိုအောင်းပြီး
နာကျင်ခြင်းရဲ့ သက်သေ
ဒီမျက်ရည်စက်တွေတော့
အမြင်မျက်လုံးနဲ့မပြောနဲ့
ပုံဖော်ကြည့်ရတဲ့ အတွေးနဲ့တောင်
မကြည့်နိုင်ပါဘူး ချစ်သူ  ။

အရိုးကွဲမတတ်
အေးစက်တဲ့ ဆောင်းညနက်နက်မှာ
ရေခဲတောင်တက် ခရီးဆက်ရဲပေမဲ့
အေးတဲ့ဆောင်းညက
အနွေးဓါတ်ပေးတဲ့
မီးလင်းဖိုဘေးနား
ခပ်ကွေးကွေးလေးအိပ်နေတဲ့မင်းကို
စောင်မှခြုံရဲ့လားလို့
ညညထစမ်းရတာ
ဆောင်းတွင်းရဲ့ ညတိုင်းပါ ချစ်သူ  ။

နွေ နေမင်းရဲ့

အငြိုးကြီးစွာ ကမ္ဘာမြေပြင်ကို

စူးရှရှအကြည့်ရဲ့ဒဏ်

 သဲပြင်တွေမီးထတောက်

အာခေါင်တွေကွဲအက်လည်း

ဒီခရီးကြမ်း ငါလှမ်းရဲပေမယ့်

နင်မရှိတဲ့လမ်း

နင်မရှိနဲ့နေရာ

နင်မပါတဲ့ဘ၀

နတ်ပြည်ကို အုပ်ချူပ်မင်းလုပ်ဖို့

ခေါ်ရင်တောင်

နင်မပါတဲ့ခရီး

အတွေးနဲ့တောင်မလှမ်းချင်ဘူး ချစ်သူ ။

လွင်ပြင်လှိုင်းငယ်